Sriman Narayaneeyam Daskam 55"{10 SLOKAS}

 Sriman Narayaneeyam Daskam 54"{10 SLOKAS}

నారాయణీయం దశక 55 - కాలియనర్తనం

అథ వారిణి ఘోరతరం ఫణినం

ప్రతివారయితుం కృతధీర్భగవన్ ।

ద్రుతమారిథ తీరగనీపతరుం

విషమారుతశోషితపర్ణచయమ్ ॥1॥

అధిరుహ్య పదాంబురుహేణ చ తం

నవపల్లవతుల్యమనోజ్ఞరుచా ।

హ్రదవారిణి దూరతరం న్యపతః

పరిఘూర్ణితఘోరతరంగ్గణే ॥2॥

భువనత్రయభారభృతో భవతో

గురుభారవికంపివిజృంభిజలా ।

పరిమజ్జయతి స్మ ధనుశ్శతకం

తటినీ ఝటితి స్ఫుటఘోషవతీ ॥3॥

అథ దిక్షు విదిక్షు పరిక్షుభిత-

భ్రమితోదరవారినినాదభరైః ।

ఉదకాదుదగాదురగాధిపతి-

స్త్వదుపాంతమశాంతరుషాఽంధమనాః ॥4॥

ఫణశృంగసహస్రవినిస్సృమర-

జ్వలదగ్నికణోగ్రవిషాంబుధరమ్ ।

పురతః ఫణినం సమలోకయథా

బహుశృంగిణమంజనశైలమివ ॥5॥

జ్వలదక్షి పరిక్షరదుగ్రవిష-

శ్వసనోష్మభరః స మహాభుజగః ।

పరిదశ్య భవంతమనంతబలం

సమవేష్టయదస్ఫుటచేష్టమహో ॥6॥

అవిలోక్య భవంతమథాకులితే

తటగామిని బాలకధేనుగణే ।

వ్రజగేహతలేఽప్యనిమిత్తశతం

సముదీక్ష్య గతా యమునాం పశుపాః ॥7॥

అఖిలేషు విభో భవదీయ దశా-

మవలోక్య జిహాసుషు జీవభరమ్ ।

ఫణిబంధనమాశు విముచ్య జవా-

దుదగమ్యత హాసజుషా భవతా ॥8॥

అధిరుహ్య తతః ఫణిరాజఫణాన్

ననృతే భవతా మృదుపాదరుచా ।

కలశింజితనూపురమంజుమిల-

త్కరకంకణసంకులసంక్వణితమ్ ॥9॥

జహృషుః పశుపాస్తుతుషుర్మునయో

వవృషుః కుసుమాని సురేంద్రగణాః ।

త్వయి నృత్యతి మారుతగేహపతే

పరిపాహి స మాం త్వమదాంతగదాత్ ॥10॥