Sriman Narayaneeyam Daskam 50"{10 SLOKAS}
నారాయణీయం దశక 50 - వత్సాసుర-బకాసురయోః వధం
తరలమధుకృత్ వృందే వృందావనేఽథ మనోహరే
పశుపశిశుభిః సాకం వత్సానుపాలనలోలుపః ।
హలధరసఖో దేవ శ్రీమన్ విచేరిథ ధారయన్
గవలమురలీవేత్రం నేత్రాభిరామతనుద్యుతిః ॥1॥
విహితజగతీరక్షం లక్ష్మీకరాంబుజలాలితం
దదతి చరణద్వంద్వం వృందావనే త్వయి పావనే ।
కిమివ న బభౌ సంపత్సంపూరితం తరువల్లరీ-
సలిలధరణీగోత్రక్షేత్రాదికం కమలాపతే ॥2॥
విలసదులపే కాంతారాంతే సమీరణశీతలే
విపులయమునాతీరే గోవర్ధనాచలమూర్ధసు ।
లలితమురలీనాదః సంచారయన్ ఖలు వాత్సకం
క్వచన దివసే దైత్యం వత్సాకృతిం త్వముదైక్షథాః ॥3॥
రభసవిలసత్పుచ్ఛం విచ్ఛాయతోఽస్య విలోకయన్
కిమపి వలితస్కంధం రంధ్రప్రతీక్షముదీక్షితమ్ ।
తమథ చరణే బిభ్రద్విభ్రామయన్ ముహురుచ్చకైః
కుహచన మహావృక్షే చిక్షేపిథ క్షతజీవితమ్ ॥4॥
నిపతతి మహాదైత్యే జాత్యా దురాత్మని తత్క్షణం
నిపతనజవక్షుణ్ణక్షోణీరుహక్షతకాననే ।
దివి పరిమిలత్ వృందా వృందారకాః కుసుమోత్కరైః
శిరసి భవతో హర్షాద్వర్షంతి నామ తదా హరే ॥5॥
సురభిలతమా మూర్ధన్యూర్ధ్వం కుతః కుసుమావలీ
నిపతతి తవేత్యుక్తో బాలైః సహేలముదైరయః ।
ఝటితి దనుజక్షేపేణోర్ధ్వం గతస్తరుమండలాత్
కుసుమనికరః సోఽయం నూనం సమేతి శనైరితి ॥6॥
క్వచన దివసే భూయో భూయస్తరే పరుషాతపే
తపనతనయాపాథః పాతుం గతా భవదాదయః ।
చలితగరుతం ప్రేక్షామాసుర్బకం ఖలు విస్మ్రృతం
క్షితిధరగరుచ్ఛేదే కైలాసశైలమివాపరమ్ ॥7॥
పిబతి సలిలం గోపవ్రాతే భవంతమభిద్రుతః
స కిల నిగిలన్నగ్నిప్రఖ్యం పునర్ద్రుతముద్వమన్ ।
దలయితుమగాత్త్రోట్యాః కోట్యా తదాఽఽశు భవాన్ విభో
ఖలజనభిదాచుంచుశ్చంచూ ప్రగృహ్య దదార తమ్ ॥8॥
సపది సహజాం సంద్రష్టుం వా మృతాం ఖలు పూతనా-
మనుజమఘమప్యగ్రే గత్వా ప్రతీక్షితుమేవ వా ।
శమననిలయం యాతే తస్మిన్ బకే సుమనోగణే
కిరతి సుమనోవృందం వృందావనాత్ గృహమైయథాః ॥9॥
లలితమురలీనాదం దూరాన్నిశమ్య వధూజనై-
స్త్వరితముపగమ్యారాదారూఢమోదముదీక్షితః ।
జనితజననీనందానందః సమీరణమందిర-
ప్రథితవసతే శౌరే దూరీకురుష్వ మమామయాన్ ॥10॥
Post a Comment