Sriman Narayaneeyam Daskam 22"{10 SLOKAS}

 Sriman Narayaneeyam Daskam 22"{10 SLOKAS}

నారాయణీయం దశక 22 - అజామిలోపాఖ్యానం

అజామిలో నామ మహీసురః పురా

చరన్ విభో ధర్మపథాన్ గృహాశ్రమీ ।

గురోర్గిరా కాననమేత్య దృష్టవాన్

సుధృష్టశీలాం కులటాం మదాకులామ్ ॥1॥

స్వతః ప్రశాంతోఽపి తదాహృతాశయః

స్వధర్మముత్సృజ్య తయా సమారమన్ ।

అధర్మకారీ దశమీ భవన్ పున-

ర్దధౌ భవన్నామయుతే సుతే రతిమ్ ॥2॥

స మృత్యుకాలే యమరాజకింకరాన్

భయంకరాంస్త్రీనభిలక్షయన్ భియా ।

పురా మనాక్ త్వత్స్మృతివాసనాబలాత్

జుహావ నారాయణనామకం సుతమ్ ॥3॥

దురాశయస్యాపి తదాత్వనిర్గత-

త్వదీయనామాక్షరమాత్రవైభవాత్ ।

పురోఽభిపేతుర్భవదీయపార్షదాః

చతుర్భుజాః పీతపటా మనోరమాః ॥4॥

అముం చ సంపాశ్య వికర్షతో భటాన్

విముంచతేత్యారురుధుర్బలాదమీ ।

నివారితాస్తే చ భవజ్జనైస్తదా

తదీయపాపం నిఖిలం న్యవేదయన్ ॥5॥

భవంతు పాపాని కథం తు నిష్కృతే

కృతేఽపి భో దండనమస్తి పండితాః ।

న నిష్కృతిః కిం విదితా భవాదృశా-

మితి ప్రభో త్వత్పురుషా బభాషిరే ॥6॥

శ్రుతిస్మృతిభ్యాం విహితా వ్రతాదయః

పునంతి పాపం న లునంతి వాసనామ్ ।

అనంతసేవా తు నికృంతతి ద్వయీ-

మితి ప్రభో త్వత్పురుషా బభాషిరే ॥7॥

అనేన భో జన్మసహస్రకోటిభిః

కృతేషు పాపేష్వపి నిష్కృతిః కృతా ।

యదగ్రహీన్నామ భయాకులో హరే-

రితి ప్రభో త్వత్పురుషా బభాషిరే ॥8॥

నృణామబుద్ధ్యాపి ముకుందకీర్తనం

దహత్యఘౌఘాన్ మహిమాస్య తాదృశః ।

యథాగ్నిరేధాంసి యథౌషధం గదా -

నితి ప్రభో త్వత్పురుషా బభాషిరే ॥9॥

ఇతీరితైర్యామ్యభటైరపాసృతే

భవద్భటానాం చ గణే తిరోహితే ।

భవత్స్మృతిం కంచన కాలమాచరన్

భవత్పదం ప్రాపి భవద్భటైరసౌ ॥10॥

స్వకింకరావేదనశంకితో యమ-

స్త్వదంఘ్రిభక్తేషు న గమ్యతామితి ।

స్వకీయభృత్యానశిశిక్షదుచ్చకైః

స దేవ వాతాలయనాథ పాహి మామ్ ॥11॥